பெண் சிலந்திப்பூச்சியின் வீடு....

(அனார்)

ஒவ்வொரு கால்களிலும்

காமம் நடன ஊற்றாகி

கொடுக்கில் விசம் ஏற்றி... மயக்கி

மோகத் திளைப்பில் சுருளும்

ஆண் சிலந்தியைக் கலவி

ஆற அமர ஆசையாய்.... என்ன சுவையாய்.....

கொன்று................

இரத்தம் உறுஞ்சுகிறாள் பெண் சிலந்தி

நிலவில் துளையிட்ட ராட்சத முனையை

மலை முகட்டில் இழுத்துக்கட்டி

முடிகிறாள் மறுமுனையை

முதலையின் தருணக் காத்திருப்பில்

கோடித் தாபங்களாய் வலை விரித்திருக்கிறாள்

வெறும் கோதுகளாகிய பிற பூச்சிகளும்

ஆண் சிலந்திகளின் இறந்த உறுப்புகளும்

பெண் சிலந்தியின் சிறைவாசலில் எறியப்பட்டிருக்க

கனவின் துவாரங்கள் வழி

சொட்டித் தேங்கிய

காமக் கடல் அலைகள் பாய்கின்றது

சிலந்தி வயிற்றினுள்

சிலந்திப் பெண்ணிலிருந்து தோன்றி

நீளத் தொடங்குகிற நூலாம்படைகள்

மித மிஞ்சிய வல்லமைகளாய்ப் பொங்கி

உலகைத் தாண்டிப் பெரிதாகிறது....