அக்கரைப்பற்று மாநகர சபையின் பட்ஜெட் ஏகமானதாக நிறைவேற்றம்

அக்கரைப்பற்று மாநகர சபையின் 2022ஆம் ஆண்டுக்கான வரவு- செலவுத் திட்டம் ஆளும் கட்சி, எதிர்க்கட்சி வேறுபாடின்றி ஏகமானதாக நிறைவேற்றப்பட்டுள்ளது.

அக்கரைப்பற்று மாநகர சபையின் வரவு- செலவுத் திட்டத்திற்கான விசேட பொதுச்சபை அமர்வு இன்று (14) செவ்வாய்க்கிழமை முற்பகல் கௌரவ மாநகர முதல்வர் அதாஉல்லா அகமட் ஸகி அவர்களின் தலைமையில் இடம்பெற்றது.

இதன் போது அக்கரைப்பற்று மாநகர சபையின் ஆளும் தேசிய காங்கிரஸ் உறுப்பினர்களுடன்- சபையினை பிரதிநிதித்துவபடுத்தும் ஐக்கிய தேசிய கட்சி,முஸ்லிம் காங்கிரஸ், நல்லாட்சிக்கான தேசிய முன்னணி(NFGG) உறுப்பினர்களும் 2022 இற்கான பாதீட்டினை அமோகமாய் ஆதரவளித்து வாக்களித்தமை குறிப்பிடத்தக்கது.

2021ம் நிதி ஆண்டிற்காக சமர்ப்பிக்கப்பட்ட  வரவு செலவுத்திட்டத்தினை கட்சி பேதமின்றி ஆதரித்து அங்கீகாரம் வழங்கியது போல், 2022 ம் ஆண்டுக்கான வரவு செலவு திட்டத்தினையும் அமோகமாய் ஆதரித்து அவற்றில் குறித்தொதுக்கப்பட்ட காத்திரமான மக்கள் நலனோம்பும் செயற்திட்டங்களை அமுல்படுத்தவென ஆணை வழங்கியிருக்கும் சபையின் அனைத்து கௌரவ உறுப்பினர்களுக்கும் கௌரவ மாநகர பிதா அவர்கள் மனமார்ந்த நன்றிகளை தெரிவித்துக் கொண்டார்.

வரவு- செலவுத் திட்டம் வெற்றிகரமாய் நிறைவேற்றப்பட்டதைத் தொடர்ந்து கௌரவ மாநகர சபை உறுப்பினர்கள் 2022 பாதீடு குறித்து தமது உளமார்ந்த நன்றிகளையும், பாராட்டுதல்களையும் சபையில் முன் வைத்த அதேவேளை, கௌரவ மாநகர முதல்வருக்கு தமது வாழ்த்துக்களையும் தெரிவித்துக் கொண்டமை குறிப்பிடத்தக்கது.

இன்றைய பட்ஜெட் விசேட அமர்வின் போது மாநகர சபை ஆணையாளர் ஏ.ரீ.எம்.றாபி, மாநகர சபை உத்தியோகத்தர்களும் கலந்து கொண்டனர் என்று முதல்வரின் ஊடகப் பிரிவு வெளியிட்டுள்ள செய்தியில் தெரிவிக்கப்பட்டுள்ளது.