கிழக்குப் பல்கலைக்கழக பொதுப்பட்டமளிப்பு வெகுவிமர்சையாக இடம்பெற்றது

கிழக்குப் பல்கலைக்கழகத்தின் 25வது பொதுப்பட்டமளிப்பு விழா இன்று (12) திகதி சனிக்கிழமை காலை பல்கலைக்கழகத்தின் உபவேந்தர் பேராசிரியர் வல்லிபுரம் கனகசிங்கம்  அவர்களது ஒருங்கிணைப்பில் பல்கலைக்கழகத்தின் வேந்தர் வைத்திய கலாநிதி வேல்முருகு விவேகானந்தராஜா அவர்களது தலைமையில் பல்கலைக்கழகத்தின் நல்லையா கேட்போர் மண்டபத்தில் மிகவும் கோலாகலமாக இடம்பெற்றது.

இன்றும் (12) நாளையுமாக (13) இரண்டு நாட்களில் இரண்டு அமர்வுகளாக இடம்பெறவுள்ள இப்பொதுப்பட்டமளிப்பு விழாவின்போது இம்முறை 1958 உள்வாரி மற்றும் வெளிவாரி பட்டதாரி மாணவர்களுக்கும், பட்டப்பின் தகைமை பெறுபவர்களுக்கும், கௌரவப் பட்டம் பெறுபவர்களும் தமக்கான பட்டத்தினை பெறவுள்ளனர்.

இந்நிகழ்வில் பிரதம விருந்தினராக  பல்கலைக்கழக மானியங்கள் ஆணைக்குழுவின் உப தவிசாளர் சிரேஷ்ட பேராசிரியர் சந்தன பீ.உடவத்த அவர்கள் கலந்து கொண்டு உரையாற்றியிருந்தார்.

இம்முறை இடம்பெறும் இப் பட்டமளிப்பு விழாவில் வணிக நிர்வாகத்தில் முதுமாணி, முதுகலைமாணி, முதுகல்விமாணி , அபிவிருத்திப் பொருளியலில் முதுமாணி ஆகிய 133 பட்டப்பின் தகமைகளுக்கான பட்டங்களும், 2 கௌரவப் பட்டங்களும் முதலாம் நாள் முதலாவது அமர்வில் வழங்கப்பட்டிருந்தது. 

ஏனைய இளமாணிப்பட்டங்களுக்காக 2வது அமர்வில் 408 பட்டதாரி மாணவர்களும், 3வது அமர்வில் 340 பட்டதாரி மாணவர்களும், இரண்டாம் நாள் நிகழ்வில் முதலாவது அமர்வில் 330 பட்டதாரி மாணவர்களும், 2வது அமர்வில் 360 பட்டதாரி மாணவர்களும், 3வது அமர்வில் 385 பட்டதாரி மாணவர்களும் பட்டமளித்து கௌரவிக்கப்படவுள்ளனர்.

இப்பொதுப்பட்டமளிப்பு விழாவின் முதல் நாள் நிகழ்வில் பட்டமளிப்பு விழா குழு தலைவர் பேராசிரியம் எம்.சிதம்பரேசன், பீடாதிபதிகள், கிழக்குப் பல்கலைக்கழகத்தின்  பதிவாளர் ஏ.பகீரதன், சிரேஸ்ட உதவிப் பதிவாளர் (கல்விப் பிரிவு) திருமதி.நிசாந்தினி நிருமிதன், செனட் உறுப்பினர்கள், விரிவுரையாளர்கள், கல்விசாரா ஊழியர்கள், பட்டதாரி மாணவர்கள் மற்றும் பட்டதாரி மாணவர்களின் பெற்றோர்கள் என பெருமளவிலானோர் இதன்போது கலந்து கொண்டிருந்தனர்.

கிழக்குப்பல்கலைக்கழக வரலாற்றில் முதல் முறையாக 1958 மாணவர்களுக்கான பொதுப்பட்டமளிப்பு நிகழ்வு நடாத்தப்படுவது இதுவே முதல் தடவையாகும் என்பது குறிப்பிடத்தக்கது.